WASHINGTON, AP.- Presidente Donald Trump a bisa djamars ku e no ta kontentu ku un akuerdo di presupuesto ku legisladornan a traha pa impedí un siere mas di e gobièrnu federal i finansiá konstrukshon di mas barera na frontera ku México. E lidernan republikano a respaldá e pakto bisando ku esaki ta un konseshon nesesario. E presidente no a bisa si e lo firma e pakto òf no.
“Mi no por bisa ku mi ta kontentu”, asina Trump a bisa durante reunion di e gabinete.
El a bisa ku e mester di mas tempu pa eksaminá e akuerdo ku ta aprobá ménos di e 5.700 mion dòler ku e presidente a pidi pa su muraya na frontera. “Di un manera òf otro, e muraya lo wòrdu konstruí”, menshonando e posibilidat ku e presidente mes lo “suplementá” i usa rekurso di “áreanan muchu ménos importante” di gobièrnu.
Trump a bisa ku e no ta kere ku lo bini un siere mas, kual lo bolbe afektá míles di empleado federal e fin di siman aki. “Tur kos” ta un opshon, asina Kas Blanku a bisa, pero “nos sigur no kier un siere”.
E legisladornan a yega na un akuerdo tentativo ku lo proveé kasi 1.400 mion dòler pa barera na frontera. E lei enorme di finansiamentu, ku ta kombiná shete medida di gastu den unu, lo kubri e sobrá aña fiskal, kual ta terminá riba 30 di sèptèmber.
E negoshadónan a bisa ku e akuerdo ta básikamente e mesun ku Trump a haña den desèmber, promé ku e siere.
