Presidente Donald Trump durante un reunion di gabinete na Kas Blanku
WASHINGTON, MERKA, AFP.- Presidente merikano, Donald Trump, a bisa djárason ku ainda e no ta satisfecho ku e proposishon di Iran pa yega na un akuerdo. El a bisa esaki despues ku e televishon estatal iraní a mustra detayenan di un posibel pakto.
Den un reunion di gabinete na Kas Blanku, Trump a bisa ku e no tin purá pa yega na un akuerdo.
“Iran ke yega na un akuerdo, pero ainda no a logra esaki. Ainda nos no ta satisfecho, pero nos ta spera ku esaki lo bira e kaso pronto”, asina Trump a bisa.
“Si esaki no sosodé, nos mester kaba ku e trabou akí”, asina el a añadí, refiriendo na e menasanan di bolbe realisá operashonnan militar di Merka i Israel, kual a kuminsá riba 28 di febrüari i kual a stòp den luna di aprel.
E kanal estatal iraní a bisa ku un posibel akuerdo ku Merka ta inkluí tráfiko den estrecho di Hormuz i retirá trupanan merikano den e Golfo, i tambe kita e blokeo marítimo kontra Iran. Kas Blanku a bisa ku e informashon aki ta “kompletamente falsu”.
Trump a insistí ku e no tin purá pa yega na un akuerdo, apesar ku e guera ku Iran ta subiendo kosto di bida pa tur merikano. Den novèmber e elekshonnan di mitar mandato lo tuma lugá.
E republikano tin índisenan di aprobashon histórikamente abou, ménos ku seis luna promé ku e votamentu ku lo determiná si su partido ta keda ku kontròl di Kongreso.
