Un militar ta atendé ku un Joint Direct Attack Munition (JDAM) na US Air Force B-1 na Inglatera, pa despues esaki lanta buelo direkshon pa Israel for di unda ta sigui ataká Iran.
WASHINGTON (AFP).- Ayera a duna di konosé Donald Trump ku “praktikamente no a keda nada pa ataká” den Iran i ku e konflikto lo kaba “djis aki”. “Ora mi ke pa e kos akí stòp, lo e stòp”, segun el a agregá, djis despues ku e minister israelí di defensa, Israel Katz, a deklará ku e ofensiva ku su pais a start huntu ku Merka dia 28 di febrüari lo sigui “sin límite di tempu”.
Dilanti di periodistanan den White House, Trump a splika ku “djis aki, hopi lihé lo tin un gran seguridat” den e kanal di Ormuz. Merka a lokalisá i ataká 28 mina iraní den e zona, segun el a bisa. Djamars e sifra ei tabata na 16.
Iran di su parti a duna di konosé di a ataká un barku ku bandera liberiana di propiedat israelí i un barku di kònteiner tailandes den e zona. E mando militar norteamerikano pa Medio Oriente a atvertí e iranínan pa evitá e hafnan sivil ku ta keda usá pa finnan militar.
Trump ta hañ’é ku enkuestanan negativo den ámbito interno i miedu pa perturbashon ekonómiko mundial ku lo ta konsekuensia dje operashon kontra di Iran. E mandatario republikano, di 79 aña, ta enfrentando elekshon parlamentario desisivo na mitar di su mandato den novèmber, den kua e kontròl di Kongreso lo ta den wega.
E minister di defensa israelí a bisa ku e operashon lo sigui “miéntras ku esei ta nesesario”, te ora ku logra “tur e metanan”.
Di parti di Iran, Ali Fadavi kende ta asesor dje komandante en hefe di Guardia Revolushonario, a bisa: “Merka i Israel mester tene kuenta ku e posibilidat ku nan ta keda envolví den un guera hopi largu ku lo destruí henter e ekonomia norteamerikano ekonomia mundial”.
