SOUTH CAROLINA.- Apénas algun dia promé ku Donald Trump tene su promé evento na South Carolina, un estado ku su poblashon evangéliko a hunga un ròl importante den e primarionan presidensial, ya kaba e èks presidente ta kritikando konservativonan religioso ku a nenga di duna nan sosten su di tres kampaña presidensial.

Trump a duna di konosé ku e ta malkontentu ku e falta di lealtat di parti di lidernan evangéliko ku ta kedando atras ku nan sosten públiko pa su kampaña. I esaki ta e último dje kantidat di krítika ku el a bin ta lansa promé ku por yega na e primarionan dje partido Republikano.

“Niun hende no a hasi mas ku Donald Trump den e kampaña pa e Derecho di Bida. Mi a pone tres hues den Korte Supremo i nan tur a vota, i nan a logra algu ku mi tabatin 64 aña ta lucha pe”, asina Trump a deklará. Den e mundu di polítika tin hopi falta di lealtat i esei ta un señal di falta di lealtat, segun Trump refiriendo na lidernan evangéliko ku ta nenga di sostené su último kampaña.

E luna aki tambe Trump a kritiká oponentenan di aborto ku na su konsepto a sòru pa el a pèrdè un kantidat grandi di voto den e elekshon di término medio na 2022.

LAGA UN KOMENTARIO

Please enter your comment!
Please enter your name here