CHICAGO, USA (AFP).- E kandidato republikano Donald Trump a akusá e visepresidente merikano Kamala Harris, ku ta perfilá komo aspirante demokrat pa White House, di “ta bira pretu” pa motibunan elektoral ku bista riba elekshon di novèmber.
“El a bira hende pretu”, segun e eks presidente riba Harris durante di un enkuentro ku periodistanan afroamerikano na Chicago.
“E tabata indjan di pia te kabes i direpente awor a kambia i atrobe ta hende pretu”, segun e magnate republikano.
Kamala Harris a nase di tata hamaikino i mama di India. E ta e promé muhé di orígen di sur di Asia pa aspirá na presidensia.
E vise presidente, di 59 aña, ademas ta definí su mes komo “muhé pretu”.
E demokrat a surgi den kampaña pa White House ku respaldo di presidente Joe Biden, despues ku e mandatario di 81 aña a bandoná e karera pa reelekshon na momento ku tabatin hopi remarke riba su edat.
Faltando ménos ku 100 dia pa elekshon, Trump mester a kambia su strategia elektoral ku e retiro di Biden. E republikano tabata mek su atakenan polítiko riba salú di Biden, pero awor ta haña su mes ta buska otro argumentonan.
E bosero di White House, Karine Jean-Pierre, inmediatamente a denunsiá e komentarionan hasí riba Harris, kalifikando esakinan komo “insulto”. “Ningun hende tin derechi pa bisa otro riba manera ku esun ta identifiká su mes”, el a bisa.
Den mesun enkuentro ku periodistanan na Chicago, Trump a trese dilanti di ta “e mihó presidente pa e poblashon pretu for di despues di Abraham Lincoln”, kende a abolí sklabitut.
Trump ya tabatin deklarashon fuerte kontra di Harris, manera siman pasá den un evento na North Carolina, akusando su rival di “ehekushon di beibinan” pa su posishon na fabor di abortus.
Tambe el a bisa den entrevista na Fox News ku e visepresidente no por enfrentá lidernan mundial.
