SAO PAULO, AP.- E polítika eksterior di presidente brasilero Jair Bolsonaro, kual ta enfoká na fabor di Merka, a sufri un retroseso severo despues ku su kolega merikano Donald Trump a primintí ku lo introdusí impuesto riba heru i aluminio di e pais suramerikano.
Trump a anunsiá e menasa via Twitter, akusando Brasil i su bisiña Argentina, di manipulá nan monedanan i perhudiká agrikultornan merikano.
E visepresidente di Brasil a ninga e akusashon, pero Bolsonaro, kende ta atmirá Trump abiertamente, no a bisa masha i a indiká ku e por “yama Trump si esaki ta nesesario”.
E minister di produkshon i trabou di Argentina, Dante Sica, a señalá ku e anunsio di Trump tabata unu inesperá.
E dos nashonnan suramerikano ta entre un grupo di aliado di Merka, ku a sufri komo konsekuensia di e impuesto di heru i aluminio. E menasa di e presidente ta un ehèmpel mas di su postura instabil pa ku medidanan komersial.
Trump a pidi banko sentral di Merka pa tuma medida pa evitá ku otro paisnan ta devaluá nan moneda.
“Brasil a devaluá su moneda signifikativamente ku 10%. Esaki ta konta pa Argentina tambe”, asina Trump a bisa promé ku el a biaha pa un konferensia di NATO na London. E no a duna detaye tokante e impuestonan.
