E loke mester bira e próksimo avion di guera fabriká pa Next Generation Air Dominance (NGAD) di Boeing.
WASHINGTON (AFP).- E presidente norteamerikano, Donald Trump, ayera a firma un kontrakt ku Boeing pa un generashon nobo di avionnan di guera.
“Despues di un kompetensia rigoroso entre algun dje empresanan prinsipal aeroespasial di Merka, Forsa Aereo lo duna e kontrakt na e platafoma Next Generation Air Dominance (NGAD) na Boeing”, segun Trump a deklará den konferensia di prensa.
E kontrakt tin komo meta pa sigui e desaroyo dje sustituto di avion di kombate F-22, ku ya tin dos dékada den aktividat, pa diseñá un avion nobo i mas avansá ku por operá sin tripulashon huntu ku ‘drones’.
Trump a agregá ku pa motibu di seguridat no por referí na e monante envolví.
E anunsio lo mester ta un yudansa grandi pa Boeing, ku a pasa den un aña hopi difísil, durante kua e mester a lidia ku un welga laboral hopi largu i problemanan di seguridat den algun di su modèlnan.
E proyekto NGAD a keda suspendé den 2024 debí na preokupashon riba e kosto, un dje inkietutnan prinsipal dje di dos gobièrnu di Trump, kende a enkargá e multimionario Elon Musk pa kòrta di forma drástiko den e gastu públiko atrabes di Departamento di Efisiensia Gubernamental.
Ofisina di Presupuesto di Kongreso den 2018 a kalkulá ku e struktura di NGAD lo por kosta te asta 300 mion dòler pa unidat, un sifra hopi mas haltu kompará ku e avionnan ku aktualmente ta na disposishon di servisio militar norteamerikano.
