Presidente kubano Miguel Diaz-Canel, kende na e altura aki ya tin konosementu dje atvertensianan lansá pa Donald Trump.
WASHINGTON (AFP).- Presidente merikano Donald Trump, ayera a lansa un atvertensia na Cuba pa “yega na un akuerdo” òf enfrentá e konsekuensianan no spesifiká, i a atvertí ku e fluho di petrolio i plaka venezolano direkshon pa La Habana a para awor dirèkt. “No tin mas petrolio ni sèn pa Cuba: sero!”, segun Trump a bisa riba Truth Social. “Mi ta sugerí bosnan amablemente pa yega na un akuerdo, promé ku ta demasiado lat”, el a agregá,
E deklarashonnan aki di Trump ta tuma lugá un siman despues ku Merka a kapturá e presidente venezolano Nicolas Maduro. E operashon militar nokturno den Caracas a terminá ku morto di desena di miembro di forsanan di seguridat venezolano i kubano. Poko promé, Trump a pone un mensahe riba e ret X den kua e ta sugerí ku e sekretario di estado,Marco Rubio, lo por ta presidente di Cuba i a agregá e komentario: “E ta zona bon serka mi”.
Mas despues Trump a bisa “Cuba durante di hopi aña a biba di kantidat grandi di petrolio i sèn for di Venezuela. A kambio, Cuba a sòru pa ‘Servisionan di Seguridat’ pa e dos último diktadornan venezolano, “pero no mas!”. “E mayoria dje kubanonan aki a muri durante dje atake di Merka siman pasá, i Venezuela ya no tin mester di protekshon di matonnan ekstorshonista ku a mantené nan komo rehen durante di hopi aña”.
Bou dje embargo di Merka, La Habana kada bes a dependé mas tantu, for di aña 2000, di petrolio venezolano komo parti di un akuerdo entre e predesesor di Maduro, Hugo Chavez, kende a fayesé.
