….Ekiponan di emergensia inspekshonando dañonan despues di un bombardeo israelí den pueblo Deir Qanoun al-Nahr na sùit di Líbano ayera. Segun outoridatnan libanes, e atakenan israelí desde komienso di e fuera a kousa mas ku 2.900 morto na Líbano, inkluyendo mas ku 400 desde komienso di e tregua riba 17 di aprel….
WASHINGTON, MERKA, AFP.- Presidente merikano, Donald Trump, a bolbe atvertí Iran djadumingu, afirmando ku e pais mester move rápidamente den direkshon di un akuerdo di pas “sino lo no sobra nada mas di nan”.
Washington ta den un konflikto ku Tehran desde ku forsanan merikano i israelí a lansa atakenan importante kontra e repúblika islámiko desde 28 di febrüari. Merka a enfrentá vários opstákulo pa kibra e stankamentu i logra kaba ku e guera ku a sakudí Medio Oriente, i provoká oumento di preis di koriente i petroli.
“Pa Iran, tempu ta kabando. Pues mihó nan aktua rápido, sino lo no sobra nada mas di nan”, asina Trump a skibi riba su plataforma Truth Social.
E guera a provoká un blokeo efektivo di e estrecho di Hormuz. Mas o ménos 20% di eksportashon mundial di petroli ta pasa dor di e estrecho. Aparte di esaki, e guera a hinka Israel i Líbano tambe den un konflikto mortal.
E régimen iraní a eksihí un tregua duradero na Líbano, promé ku yega na un akuerdo di pas ku Trump. E presidente merikano a ekspresá su frustrashon i ta di opinion ku Tehran mester aseptá un akuerdo bou di su kondishonnan.
