WASHINGTON, USA.- E presidente eligí di Merka, Donald Trump, a papia ku presidente Ruso Vladimir Putin i a hasi un yamada riba esaki pa evitá ku situashon ta eskalá den Ukrania, segun un publikashon di Washington Post.
Trump a papia ku Putin djaweps for di Mar-a-lago, den estado di Florida, apénas algun dia despues di a derotá Kamala Harris den elekshon presidensial.
Representantenan dje presidente eligí no a reakshoná riba petishon pa un komentario.
Aparentemente den nan kombersashon Trump a rekordá Putin riba e gran presensia militar di Merka den Europa. Mas aleu, e presidente eligí a ekspresá e interes pa futuro kombersashonnan pa diskutí riba “e solushon di e guera den Ukrania” despues ku den kampaña el a papia di un final lihé dje konflikto di kasi tres aña i a kuestioná e apoyo multimionario di Washington na Kiev.
Na kuminsamentu di siman pasá, Putin a felisitá Trump pa ta “balente” despues di sufri un intento di asesinato den yüli i a bisa di ta “kla pa kombersá”.
Durante di kampaña, Trump a bisa di lo pone fin n’e guera den Ukrania inkluso promé ku e hura komo presidente, dia 20 di yanüari, pero nunka a splika kon e ta logra e meta ei.
Ta antisipá ku pa kualke akuerdo lihé lo ta nesesario pa Kiev aseptá pa entregá parti dje teritorio ku el a pèrdè durante dje invashon ruso den zùit i ost dje pais.
Kiev, ku ta enfrentá problema ku kantidat di sòldánan i insertidumbre riba e apoyo di Merka, a bai kontra di un akuerdo asina.
Presidente Volodimir Zelenski a bisa ku sede teritorio òf bai di akuerdo ku eksigensianan ruso solamente lo trese kuné ku Kremlin lo bin ku mas agreshon.
Den wikènt último, ehérsito ruso a lansa 145 ‘drone’ kontra di Ukrania, segun Zelenski, miéntras ku Rusia a bisa di a tumba 34 ‘drone’ ukraniano ku tabatin Mosku komo meta.
