Presidente chines Xi Jinping (r) i presidente norteamerikano Donald Trump ayera den Zhongnanhai Garden di Beijing.
WASHINGTON (AFP).- Donald Trump ayera a atvertí Taiwan kontra kualke deklarashon di independensia, despues ku e presidente chines, Xi Jinping, a preshon’é pa Washington no apoyá e isla. Trump a konkluí su bishita di estado bisando di a sera un akuerdo komersial “fantástiko”, ounke e no a duna muchu detaye i no ta parse di a logra ningun avanse ku China, relashoná ku e guera ku Iran. Trump a invitá Xi Jinping pa bishitá Washington den sèptèmber, loke a indiká ku ta probabel ku tur dos parti ta buska pa stabilisá e relashonnan, hopi biaha turbulento, entre e dos ekonomianan mas grandi di mundu.
Den un asuntu klave pa Xi, Trump a laga komprondé bon kla ku e lo oponé un deklarashon di independensia di Taiwan. “Mi no tin gana pa un hende deklará independensia i, bosnan sa kaba, despues nos tin ku rekoré 15.000 kilometer pa bai den guera”, segun Trump a bisa. “Nos no ke pa un hende pensa: nos a proklamá independensia pa motibu ku Merka ta apoyá nos. Mi ke pa Taiwan baha e temperatura”, el a deklará.
Merka ta rekonosé solamente China i no a apoyá e independensia ofisial di Taiwan, pero histórikamente tampoko a yega di manifestá si e ta bai kontra. Segun lei merikano, Washington ta obligá na suministrá arma na Taiwan pa su defensa, pero no a keda bon kla si forsanan norteamerikano lo bai e isla pa yud’é den kaso di atake.
Djaweps último, den un deklarashon firme ku no ta kustumber, e presidente chines Jinping a atvertí ku “e asuntu di Taiwan ta esun mas importante den e relashonnan entre Washington i Beijing. “Si manehá esei bon, e relashon entre e dos paisnan lo sigui ta stabil. Si maneh’é malu, e dos paisnan lo dal kontra di otro, òf inkluso drenta den un konflikto”, segun Xi a bisa na prensa.
