WASHINGTON (AFP).- E presidente di Merka, Donald Trump, a sugerí un biaha mas ku lo e por opta pa un di tres periodo di gobiernu, loke ta bira un reto na e norma konstitushonal ku ta limitá e mandato presidensial na dos periodo.
“No ta chansa”, Trump a kontestá ora ku a pidié pa aklará su komentarionan riba e posibilidat pa buska un mandato presidensial nobo. “Tin manera pa hasi esei”, segun el a bisa den un yamada na e kanal di televishon NBC.
E multi mionario di 78 aña a bisa na vários okashon ku e por aspirá na mas ku dos mandato, pero su deklarashon di ayera a bira esun mas konkreto riba e tema.
Trump a lansa su di dos presidensia ku un áwaseru sin presedente dekreto i a usa e hòmber mas riku na mundu, Elon Musk, pa desmantelá partinan di gobièrnu federal. Trump a sigurá ku su siguidónan ke mas.
Pero segun Trump ku ta “demasiado trempan pa pensa kon pa hasi e kambio di lei”.
Ora ku NBC a puntra Trump riba un posibel esenario den kua e vise presidente JD Vance lo presentá su kandidato komo presidente i despues renunsiá pa entregá poder na Trump, e mandatario a bisa ku “esei ta un manera”.
El a agregá ku “tin mas manera”, pero a nenga pa bai den detaye.
