WASHINGTON (AFP).- Presidente di Merka, Donald Trump, a bisa ayera ku lo yega e momento ku lo e papia ku e presidente venezolano, Nicolás Maduro, pero ku e no ta deskartá e posibilidat di manda tropanan norteamerikano pa e pais suramerikano. E deklarashonnan di Trump a tuma lugá meimei di tenshonnan pa e presensia militar norteamerikano den Karibe pa lucha kontra di narkotráfiko. Venezuela ta mira e operashon komo un paso pa tumba Maduro, akusá di parti di Washington di ta na kabes di un organisashon “terorista” dediká na tráfiko di droga.
“Na algun momento lo mi papia kuné”, Trump a bisa na periodistanan. “Maduro no ta bon pa Merka”, el a agregá.
Puntr’é si e ta deskartá di manda tropanan merikano pa Venezuela, Trump a kontestá: “Nò, mi no ta deskartá nada”. “Nos tin ku atendé ku Venezuela”, segun el a agregá. “Nan a manda algun shen mil hende for di nan prizònnan pa nos pais”.
