WASHINGTON (AFP).- E presidente norteamerikano Donald Trump, ayera a duna di konosé ku “tur kos a sali perfektamente bon” despues di a hasi su chekeo médiko anual, faltando poko dia pa kumpli 80 aña. Esaki ta e di tres eksámen médiko ku e mandatario a hasi for di despues di a regresá White House den yanüari di 2025. Trump a hasi e tèstnan den e hospital militar Walter Reed, serka di Washington.
E mandatario republikano ta e presidente di mas edat ku hamas a okupá White House, i regularmente ta broma di su kondishon mental i físiko, kompará ku su predesesor demokrat, Joe Biden. Algun opservador a mustra riba e echo ku tin biaha Trump ta duna señal di ta kabishá den aktonan públiko, i medionan di komunikashon a yega di mustra potrètnan di su man ku plèknan kòrá. Miembronan di su gabinete, manera e sekretario di estado Marco Rubio, ta insistí ku Trump tin un ritmo di trabou hopi intenso pa su edat.
White House sa publiká un resúmen di eksámennan físiko di presidente den kuestion di algun ora i dia, pero e detayenan ta keda na diskreshon dje persona.
