Te na Atenas, sostenedónan di Partido Komunista Griego (KKE) a tene un demostrashon kontra dje plannan di Donald Trump relashoná ku Cuba.
WASHINGTON (AFP).- Presidente norteamerikano Donald Trump ayera a deklará di ta spera di tin “e honor pa tuma Cuba” durante di su mandato, den pleno kombersashon ku e régimen di La Habana, ku ta batí pa motibu dje krísis energétiko. “Mi ta kere ku realmente lo mi tin e honor di tuma Cuba, di algun manera”, segun Trump a deklará na periodistanan. “Mi ke men, liberá Cuba òf tuma Cuba. “P’ami bisa e bèrdat, mi ta kere di por hasi loke ami ke. Na e momento aki ta un nashon hopi debilitá”.
E presidente kubano, Miguel Diaz-Canel, djabièrnè a rekonosé ku e dos gobièrnunan ta manteniendo negosiashonnan, meimei di un blokeo kasi total di Washington pa loke ta entregá di petrolio na e isla, ku ta sufri di black-out ku ta dura oranan largu.
Washington ta menasá ku sanshon pa e paisnan ku ke entregá krudo na e isla, ya ku ta konsiderá ku e gobièrnu kubano ta unu komunista i ta forma un menasa.
Ta habri invershon pa migrantenan
Kubanonan ku ta biba den eksterior i nan desendientenan por invertí i tin nan mes negoshi na Cuba, segun a keda anunsiá ayera dor di e gobièrnu komunista na momento ku ekonomia dje pais ta kasi paralisá. “Cuba ta habrí pa mantené un relashon komersial ku empresanan norteamerikano” i “tambe ku kubanonan bibá na Merka i nan desendientenan”, segun e minister kubano di Komersio Eksterior i Invershon Strañero, Oscar Perez-Oliva. El a bisa esei den un entrevista ku e kadena di televishon Norteamerikano NBC i ku a keda publiká ayera.
E anunsio ta tuma lugá na momentu ku ekonomia dje isla ta pasando den un krísis hopi serio ku kasi tin ekonomia kompletu dje isla paralisá.
