WASHINGTON, AP.- Fadá ku e krítikanan kontra su akuerdo, Trump a bisa ku aparensia ta gaña i ku México a aseptá pa hasi muchu mas ku loke a wòrdu anunsiá djabièrnè i ku pronto lo revelá mas detaye. Su krítikonan ta bisa ku e akuerdo pa evitá impuesto riba produktonan mehikano básikamente ta reforsá e labornan eksistente na frontera.
“Nos a dokumentá i firma un otro parti importante di e akuerdo di Inmigrashon i Seguridat ku México, un ku Merka ta pidiendo pa basta tempu kaba”. Trump a bisa ku esaki lo wòrdu “revelá den futuro no lehano i mester di voto di kuerpo legislativo di México”.
“Nos no ta kere ku lo tin problema ku e votamentu, pero si pa un òf otro motibu e wòrdu rechasá, nos lo introdusí e impuesto riba produktonan mehikano”.
E mandatario no a duna ningun detaye durante un entrevista telefóniko ku CNBC djaluna mainta.
Vários ta kuestioná kua parti di e akuerdo ta nobo. Por ehèmpel, e pakto a inkluí un kompromiso kaminda México ta desplegá su Vigilante Nashonal na frontera ku Guatemala. Sin embargo, México ya tabatin intenshon di hasi esaki promé ku Trump a lansa su menasa di impuesto.
Trump ta defendé e akuerdo i su menasa di imponé impuesto riba produktonan mehikano pa preshoná e pais pa tuma medidanan mas severo pa para a fluho di migrantenan sentroamerikano ku ta pasa via México pa yega na frontera sùit di Merka. E mandatario ta insistí ku sin e menasa di impuesto, México lo no a tuma akshon òf hasi èkstra esfuerso.
