WASHINGTON, AP.- Presidente merikano Donald Trump a tweet djárason tokante su desishon pa duna direktor di FBI James Comey retiro. Tantu republikano komo demókratanan “lo gradisí mi pa esaki”. Trump no a menshoná e posibel konsekuensianan di e retiro pa investigashonnan di FBI i Kongreso tokante kontraktnan entre su kampaña elektoral di 2016 i Rusia.
Trump a bisa ku e lo nombrá un remplasante, kende “lo hasi un mihó trabou, rekuperando e prestigio di FBI”.
E retiro abrupto di Comey a generá insertidumbre tokante e futuro di investigashon di FBI tokante e konekshonnan di Trump su kampaña ku Rusia i a krea sospecho inmediato den un intento pa opstakulisá e presidente for di komienso. Trump a kritiká e investigashonnan, kual el a kalifiká komo “falsu” i ningando eksistensia di lasonan di su kampaña ku Moscow.
E demókratanan ta kompará e despedida di Comey ku e supuesto “Masakre di Djasabra Anochi” di presidente Richard Nixon durante e investigashon di e skandal Watergate. Algun republikano a ekspresá preokupashonnan pa ku esaki.
E lider di minoria demókrata di Senado, Chuck Schumer, a yama sekretario di Hustisia Jeff Sessions i Rod Rosenstein pa paresé dilanti di Senado pa rospondé nan preguntanan tokante e sirkunstansianan di Trump su desishon.
