WASHINGTON (AFP).- Presidente norteamerikano Donald Trump a ekstendé ku 75 dia e ‘deadline’ pa TikTok por haña un kumpradó no chines si nan ke evitá di keda prohibí na Merka pa motibunan di seguridat nashonal.
Trump ya a posponé esaki ku 75 dia na kabamentu di yanüari, apesar di un lei aprobá den 2024 pa Kongreso. E lei ei ta obligá e empresa mama dje ret sosial, ByteDance, pa entregá e kontròl di TikTok.
E esfuerso di parti di Merka ta pa stroba ku outoridatnan chines tin akseso na datonan personal di usadónan di TikTok kendenan ta residensiá na Merka òf por tin influensia den opinion norteamerikano via dje poderoso grupo di ret sosial. Nunka a presentá e pruebanan ku ta hustifiká e temornan ei. E fecha límite awor ta 19 di yüni.
