SINGAPORE, AP.- Presidente Donald Trump a deklará ku e desnuklearisashon di Norkorea mester ta total i verifikabel.
‘Nos mester revisá esaki, i nos ta bai revis’é tambe, e mester ta total i kompleto”, asina Trump a bisa na reporteronan algu promé ku el a sali di Singapore den e avion presidensial Air Force One, despues di su kumbre ku e lider norkoreano Kim Jong Un.
Trump kende a sali di Singapore un dia promé di loke a wòrdu planiá, a bisa ku e no kier keda un anochi mas debí ku el a logra loke el a biaha pe na e pais. “No tin nada mas ku nos por a hasi”, asina e mandatario a bisa.
Presidente Trump a sorprendé e península koreano despues di anunsiá e paro di maniobranan militar anual entre Merka i Surkorea.
E maniobranan a wòrdu konsiderá komo defensivo i vital pa seguridat di aliadonan di Merka den Asia. Trump a ripití e postura norkoreano ku e ehersisionan militar ta “provokador”.
Trump a bisa ku e maniobranan ta “sumamente kostoso”, Surkorea no ta aportá mashá na esakinan i a agregá ku e ehersisionan lo ta “inapropiá” debí na e relashon nobo entre Merka i Norkorea.
Trump a indiká ku probablemente mester organisá un segundo reunion ku Kim Jong Un. Ademas el a indiká ku a logra mas asuntu di loke nan a spera den su enkuentro huntu ku Kim.
“Nos lo reuní otro siman pa drenta den detaye”, asina Trump a bisa den un konferensia di prensa.
Kim Jong Un lo destruí un sitio di prueba di motor misil importante.
