WASHINGTON, USA.- E presidente eligí di Merka, Donald Trump, a kumpli ku su promesa ora ku el a pone e hòmber mas riku di mundu, Elon Musk, na kabes di un departamento ku el a definí komo esun enkargá pa e “efisiensia gubernamental”.
E propietario di Tesla i SpaceX, hopi aktivo den e kampaña dje magnate, lo dirigí e dependensia aki huntu ku e empresario Vivek Ramaswamy, kandidato ku a pèrdè den elekshonnan republikano.
“Huntu, e dos norteamerikanonan maravioso aki lo drecha e kaminda pa mi gobièrnu desmantelá e burokrasia gubernamental, baha di forma drástiko e ekseso di leinan, kòrta den gastunan ku no tin mester i restrukturá e agensianan federal”, segun Trump a bisa den un komunikado.
E presidente eligí a sigui repartí funshonnan, poniendo aliadonan di linia duru pa e puestonan mas importante di su futuro gobièrnu promé ku e reuní awe ku presidente Joe Biden den White House.
