WASHINGTON, AP.- Kontra e preshon di aliadonan ansioso, presidente Donald Trump a firma un òrdu ehekutivo ku lo pone fin na e separashon di famianan ku wòrdu detené pa drenta Merka sin outorisashon.
Esaki ta un grupo drástiko pa Trump, kende a insistí ku no tin mas opshon ku separá famianan ku ta obligá pa lei i un desishon hudisial.
“Nos kier mantené e famianan uní”, asina e presidente a agregá.
Nielsen, e presidente i otronan a bisa reiteradamente ku e úniko forma kon pa pone fin na separashonnan ta mediante un lei nobo di Kongreso, pero demókratanan i algun republikano ta bisa ku e presidente lo por hasi esaki ku un simpel yamada telefóniko.
Den notisianan di último dianan tabatin imágennan di vários mucha sera den kouchinan na frontera, i grabashonnan di oudio di muchanan yorando i sklamando pa nan mayornan. E imágennan a kousa rabia, kuestionamentunan riba moralidat i preokupashon di e republikanonan riba e impakto negativo den elekshonnan di mitar periodo den novèmber.
“Nos ta bai mantené frontera hopi safe, pero nos lo mantené famianan uní”, asina Trump a bisa i a agregá ku e no ta gusta ni e “imágennan” ni “sentimentu” di e muchanan separá di nan mayornan.
El a agregá ku su òrdu lo no kaba ku e polítika di “sero toleransia” kua ta prosesá adultonan detené despues di krusa frontera sin outorisashon. E òrdu tin e ophetivo pa mantené famianan huntu na momentu ku nan wòrdu detené, aselerá nan kasonan i pidi Departamento di defensa pa yuda hospedá e famianan aki.
