Donald Trump ta nenga di ta pega soño na momentonan ménos apropiá.
WASHINGTON (AFP).- Donald Trump ayera a insistí riba su “salú perfekto” i su abilidatnan kognitivo, un dia despues di publikashon di un entrevista den kua e la defendé su mes di ta perfekto pa sigui ku su trabou i esaki meimei di dudanan riba su estado klíniko. “Dòkternan di White House a kaba di informá mi ku mi ta gosa di un “salú perfekto” i ku m’a optené un kalifikashon ekselente, pues m’a respondé di forma korekto e 100% di preguntanan den mi tèst kognitivo i esaki pa di tres biaha konsekutivo. Esei ta algu ku ningun otro presidente ni vise-presidente anterior por a hasi”, segun el a skirbi riba su Plataforma Truth Social.
E korant Wall Street djaweps a publiká un entrevista ku Trump, kende ku 79 aña ta e persona di mas edat pa asumí presidensia na Merka. Den e diálogo, e presidente a kulpa uso di aspirin pa markanan kòrá grandi na su man drechi, ku kada bes e ta kubri ku verbant òf makiahe. Mas aleu el a nenga di a pega soño durante reunionnan ku a pasa na televishon, bisando ku simplemente e tabata “sera su wowonan” komo “manera pa relahá”. Tambe el a aklará un deklarashon anterior ku el a someté su mes na un resonansia magnétiko den òktober, afirmando ku en realidat tabata un tomografia di kòmpiuter, un eksámen mas rápido.
Den su publikashon anterior, Trump a trese dilanti ku kualke kandidato presidensial òf vise presidensial mester ta obligá na hasi un eksámen kognitivo, “sólido, signifikativo i konfiabel”.
“Nos gran pais no por keda goberná pa personanan “estúpido òf inkompetente”, segun el a skirbi, den un akusashon indirekto na su predesesor, Joe Biden, e presidente di mas edat den historia di Merka, kende a retirá di kontienda elektoral di 2024 despues di un desastroso debate ku a generá preokupashon riba su estado di salú kognitivo.
