Un potrèt saká for di transmishon di Bahrain TV ta mustra daño enorme kousá pa ‘drones’ merikano i israelí na Iran.
TEHERAN, Iran (AFP).- Presidente norteamerikano Donald Trump ayera a duna di konosé ku el a kanselá e atakenan ku e tabatin planiá kontra di Iran, despues di a menasá na bombardiá e repúblika islamita i tuma su terminalnan di petrolio.
E hefe di forsanan armá iraní, e general Ali Abdollahi, a duna di konosé ku un atake nobo di Merka lo risibí “un kontesta mas duru ku esun anterior, i e vlamnan di guera, ademas di krea inseguridat den e region, lo ekstendé”.
Promé ku esei, Trump a publiká riba Truth Social ku ehérsito di Merka lo gòlpia Iran “hopi fuerte awe’nochi”. “Na un momento den un futuro no muchu leu, nos lo tuma e isla di Jark i otro puntonan di infrastruktura petrolero, i lo asumí e kòntròl total dje merkadonan di petrolio i gas, hopi paresido ku lokual nos a hasi ku Venezuela”, segun el a agregá den su mensahe.
Sinembargo, mas despues e mandatario a anunsiá di ta anulá e atakenan planiá. “Teniendo kuenta ku e kòmbershonnan ku e Repúblika Islamita di Iran a keda aprobá pa outoridatnan mas haltu dje pais, ma kanselá e atakenan i bombardeonan”, el a skirbi riba Truth Social. ”E kòmbersashonnan i último puntonan a keda aprobá pa tur esnan impliká”, segun el a bisa mas aleu, menshonando paisnan di Golfo, Turkia i Israel.
Pero e agensia di notisia iraní FARS, sitando un fuente anónimo yegá na e tim negoshadó iraní, a trese dilanti ku Tehran no a aprobá ningun teksto di akuerdo.
