Banderanan di paisnan bisiña Merka i Canada ta waya banda. Riba nivel polítiko tin poko tenshon entre e dos paisnan.
WASHINGTON (AFP).- Presidente di Merka, Donald Trump, di forma abrupto a kòrta negosiashonnan komersial ku Canada, furioso pa un kampaña publisitario den e pais bisiña kontra dje oumento di belasting, miéntras ku e promé minister kanades, Mark Carney, ta purba na trankilisá e situashon. Ta trata di un kambio repentino di posishon dje mandatario republikano despues di un reunion kordial dia 7 di òktober na White House ku e promé minister kanades.
Riba su página Truth Social, Trump ayera a ekspresá su desakuerdo pa loke el a kalifiká komo un anunsio “falsu” ku, segun e, a sita di forma eróneo e eks-presidente norteamerikano Ronald Reagan papiando riba e polítika di belasting di importashon. Segun Trump, e anunsio, produsí pa e provinsia kanades di Ontario i ku mester keda difundi den kadenanan norteamerikano di televishon, ta buska pa “intervení den e desishon di Korte Supremo di Merka”, ku tin ku pronunsiá su mes riba su belastingnan global.
Ayera mainta el a bolbe rematá kontra di su bisiñanan den un seri di mensahe fuerte riba su retnan sosial den kua e ta bisa ku “Canada a traha trampa i a keda gará”. E promé minister di Ontario, Doug Ford, a bisa na X djabièrnè ku, despues di a papia ku Carney, nan lo retirá e publisidat “kuminsando djaluna pa permití e reanudashon dje negosiashonnan komersial”. Ford a pidi su asesornan pa mantené e emishon dje anunsio durante e promé dos dianan di wega dje fin di siman aki di Seri Mundial di beisbòl, den kua e ekipo kanades Toronto Blue Jays, lo enfrentá Los Angeles Dodgers.
