WASHINGTON, AP.- Presidente Donald Trump a bisa ayera ku Merka ta armá i kargá pa tuma represaya kontra Iran pa e tumbamentu di un dron merikano pero a kanselá e atake ku misilnan 10 minüt promé ku a kuminsá esaki pasobra nan a bisé ku 150 persona lo muri.
E deklarashon di Trump via Twitter ta un indikashon mas resien di ku e no ke eskalá e enfrentamentu. Pero e no a deskartá un atake den futuro i a bisa ku Merka nunka lo permití Iran poseé armanan nuklear.
El a bisa ku e sanshonnan ekonómiko ta paralisando e ekonomia iraní i ku lo tin mas. Pa su parti Iran tambe no ta mustra masha kontentu ku e pronunsiamentunan duru.
E general Amir Ali Hajizadeh hefe di e divishon aero-espasial di guardia revolushonario a bisa na prensa ku un avion di spionahe merikano ku 35 tripulante na bordo tabata bula serka di un avion no tripulá RQ-4A Global Hwak pero ku Iran a opta pa tumba únikamente e avion no tripulá esta e dron. El a bisa ku Iran a emití vários atvertensia promé di a tumba e dron ku un misil.
Djaweps anochi, atministrashon federal di aviashon a prohibí e aerolíneanan merikano pa bula riba partinan di golfo di pérsiko i di Oman i vários aerolínea internashonal a kuminsá desviá nan buelonan di e zona entre nan Britisch Airways, esun oustraliano Qantas, e aleman Lufthansa i esun ulandes KLM.
