Tambe ménos US$ pa Ukrania
WASHINGTON, USA.- E presidente eligí di Merka, Donald Trump, ayera a ripití su promesanan di kampaña pa realisá deportashon masivo di inmigrantenan sin dokumento i bin ku sierto tipo di belasting, miéntras ku el a insinuá ku su pais por sali for di NATO (North Atlantic Treaty Organization).
Den su promé entrevista ofisial na televishon, seis siman promé ku su toma di poseshon, e magnate republikano a ratifiká ku lo e sòru pa deportashon masivo di inmigrantenan indokumentá.
“Mi ta kere ku mester hasié. Ta algu difísil, ta hopi difísil pero mester tene kuenta ku normanan, reglamentonan, leinan. Nan a drenta ilegal”, segun el a bisa den e programa ”Meet the Press with Kristen Welker” dje kadena NBC.
El a bisa ku tambe lo pone fin na e derechi protehá pa lei pa un hende ku nase den e pais sin mas ta norteamerikano, un derechi ku el a kalifiká komo algu “ridíkulo”.
“Si por, nos lo hasié via di un akshon ehekutivo”, el a bisa refiriendo na e manera ku e ke tuma e medidanan.
“Nos tin ku kambia e derechi ei”, segun el a insistí. “Kisas nos mester bai bèk serka komunidat, pero mester kaba kuné”.
Mas aleu el a konfirmá ku e apoyo di Merka na Ukrania lo keda redusí.
E entrevista a keda grabá djabièrnè pero a bai den publisidat djadumingu, despues di reunionnan di Trump na Paris ku presidentenan di Fransia i Ukrania durante di wikènt último, su promé biaha pafó di Merka for di despues di a gana elekshon den novèmber.
Pa loke ta trata NATO, Trump a ripití su menasa pa bandoná e organisashon, eksistente na Europa for di despues di Segunda Guera Mundial. E ta insistí ku e aliadonan di Merka no ta paga sufisiente pa nan defensa.
“Si nan ta paga nan kuenta i si ami ta kere ku nan ta trata nos di manera hustu, e ora ei sigur nos lo keda den OTAN”, segun el a bisa.
