E destrukshon dje bombardeo norteamerikano den Iran ta enorme.
WASHINGTON (AFP).- Presidente merikano Donald Trump ayera a duna di konosé ku ta “posibel” ku ta yega na un akuerdo di pas ku Iran, pero el a mantené e menasa di reanudá e bombardeonan. Esei na momento ku e negoshadó prinsipal iraní ta akusá Washington di ta buska “rendishon” dje pais.
“Nos tabatin hopi bon kòmbersashon den e último 24 oranan, i ta posibel ku nos ta yega na un akuerdo”, segun Trump a bisa na periodistanan. E multimionario republikano for di mainta trempan a mustra un postura di ta habrí pa yega na un akuerdo. “Si suponé ku Iran ta aseptá e loke a akordá, e legendario ‘Furia Épiko’ lo yega na su fin”, segun Trump a skibi riba Truth Social. Pero si Iran no yega na un akuerdo, “e bombardeonan lo kuminsá di nobo, i lo ta hopi tristu, un nivel i un intensidat pió ku loke nan a sinti kaba”, segun el a atvertí refiriendo na e bombardeo ku Merka a start for di 28 di febrüari riba Iran.
E negoshadó prinsipal di Iran, Mohamad Baqer Qalibaf, a bisa ku Merka ta buska pa fòrsa ku Teheran entregá, ku e meta pa “destruí e posishon dje pais”. Pero e República Islamita a evitá di tuma un desishon, i e bosero di su diplomasia, Esmail Baghai, a bisa ku “Iran ta sigui evaluá e plan i e proposishon norteamerikano”.
