WASHINGTON (AFP).- Donald Trump ayera a tilda komo “estupides” e kolaborashon di sinku senador republikano pa aprobá un proyekto di lei ku lo limitá su podernan militar den Venezuela. “Republikanonan mester tin bèrgwensa dje senadornan ku a kaba di voto huntu ku demokratnan pa purba kita for di nos e kapasidat pa lucha i defendé Merka”, segun Trump a skirbi riba Truth Social. “Pero di tur manera, i apesar dje ‘estupides’, e Lei di Podernan di Guera ta inkonstitushonal”, segun Trump a bisa, refiriendo na e resolushon aprobá poko promé den Senado.
E resolushon ta representá un paso mas pa e votashon desisivo, ku ta bini otro siman. E proyekto di lei pa limitá, den kaso partikular di Venezuela, e podernan pa deklará guera i realisá akshonnan militar, tin masha poko chèns pa bira realidat. Ounke ku Kámara di Representante aprobá e proyekto, Trump lo por veto pa esaki. I pa superá e veto presidensial tur dos kámara mester mustra mayorianan hopi grandi.
“E senadornan “Susan Collins, Lisa Murkowski, Rand Paul, Josh Hawley i Todd Young no mester bolbe keda eligí pa ningun funshon”, segun Trump a eksigí. “E votashon aki ta stroba gravemente e outodefensa di Merka i e seguridat nashonal, i ta limitá e outoridat dje Presidente komo Komandante en Hefe”, segun el a reklamá.
E debate konstitushonal a start ku e atakenan kontra di supuesto barkunan di droga den Karibe, i a finalisá ku e operashon militar, ku a inkluí bombardeonan pa kapturá e presidente venezolano Maduro i esaki su kasá Cilia Flores.
