WASHINGTON, AP.- Presidente Donald Trump a afirmá djárason ku e resistensia pa aseptá e yudansa humanitario di parti di e mandatario venezolano Nicolás Maduro ta un “eror teribel” ku ta ilustrá loke por pasa si e gobièrnu robes tin poder den un pais.
Trump a indiká ku Merka i su aliadonan lo tuma medidanan nobo kontra Maduro, kende a blokiá tur entrega di yudansa internashonal pa e venezolanonan. E turbulensia polítiko i ekonómiko na Venezuela a kousa un skarsedat di produktonan básiko, obligando miónes di venezolano pa hui pa Colombia òf partisipá den protestanan masivo pa eksihí renunsia di Maduro.
Merka i otro nashonnan ta na fabor pa Maduro bandoná su puesto i a rekonosé e lider opositor Juan Guaidó komo presidente legítimo di Venezuela.
Trump a indiká ku su Maduro mester keda na poder e tin un “plan B, C, D, E i F. Tin hopi kos ku ta pasando den Venezuela, ku hopi hende no sa di dje.
Den un aparishon huntu ku e presidente kolombiano Ivan Duque, Trump a bisa ku mayoria pais kier yuda Venezuela.
Maduro a konsiderá e reunion di Trump i Duque komo un “fiesta di odio”. Ademas, el a bisa ku e yudansa humanitario ta forma parti di un golpe di Estado enkabesá pa Merka pa kit’e di su puesto komo presidente di Venezuela.