WASHINGTON, USA (AFP). E presidente di Merka, Donald Trump, a lansa e loke el a bisa ta su “último atvertensia” na e movementu islamita palestino Hamas pa esaki aseptá un akuerdo pa liberá rehennan israelí den Gaza. “E israelínan a aseptá mi kondishonnan i awor ta turno di Hamas pa hasi esei. M’a atvertí nan pa e konsekuensianan den kaso ku nan no aseptá. Esaki ta mi delaster atvertensia, lo no tin mas”, segun e presidente a skirbi riba Truth Social.
Milisianonan di Hamas a kapturá 251 hende durante e atake kontra di Israel riba 7 di òktober di 2023, loke a start e guera den Gaza. Di e kantidat ei, ta kalkulá ku 47 ainda ta den e teritorio palestino.
Ehérsito di Israel ta bisa ku 25 di nan ta morto i Israel ta buska manera pa hiba e restunan bèk pa Israel.
No ta e promé biaha ku Trump ta menasá Hama. Na kuminsamentu di mart, Trump a hasi un atvertensia similar na Hamas despues di a reuní na White House ku ocho rehen liberá. Na e okashon ei el a eksigí pa liberá tur e sobrá rehennan di forma dirèkt i entregá kurpa di e rehennan ku a pèrdè nan bida. Si no hasi esei, el a bisa, “tur kos ta kaba pa bosnan”.
