Lidernan di algun pais di NATO, presidente turko Recep Tayyip Erdogan (3-r), presidente norteamerikano “Donald Trump (4-r), presidente franses Emmanuel Marcron (4-d), Sekretario General di NATO Mark Rutte (meimei) ta para pa un potrèt huntu ku Rei Willem Alexander i Reina Maxima di Hulanda.
DEN HAAG (AFP).- Rondoná pa konflikto, NATO (North Atlantic Treaty Organization), ta dispuesto na hasi ofisial un oumento drástiko dje gastu den Defensa eksigí pa e presidente norteamerikano Donald Trump, kende a rematá kontra dje negativa di Spaña pa kumpli ku e meta pa invertí un 5% di su PIB.
Despues di a anunsiá ku ta para e guera entre Iran i Israel, e mandatario republikano a yega Den Haag, nèt na tempu pa akudí na e bankete ofresé pa e rei Willem Alexander na e 32 lidernan dje aliansa.
E republikano a probechá na hasi algun deklarashon kòrtiku na prensa den Air Force One pa preshoná su sosionan europeo kaminda mas ta hasi doló: ku e artíkulo 5 di Tratado di Washington, ku ta obligá hinter e aliansa pa defendé un pais miembro den kaso di un atake.
“Ta dependé di su definishon. Tin vários manera pa definí e artíkulo 5”, segun e presidente den kontesta na un pregunta riba su kompromiso ku defensa mutuo.
El a kritiká Spaña, ku no ke bai mas leu ku 2.1% ku e argumento ku un meta di 5% lo oblig’é pa subi impuestonan i sakrifiká gastu sosial.
“Bosnan tin un problema ku Spaña”, e mandatario a bisa den avion. “Spaña no ta di akuerdo (ku e oumento di gastu 5%), loke ta hopi inhustu pa otronan” dje aliansa.
T’asina ku Donald Trump, kende su pais den 2024 a aportá ku 62% dje total di gastu den defensa di OTAN, ta eksigí pa e miembronan europeo i Canada subi nan invershon den e sektor pa 5% di PIB nashonal di awor te ku aki dies aña.
Si esei no ta e kaso, e ta menasá pa no asistí den kaso di agreshon kontra dje “mal pagadónan”, ademas di redusí su presensia militar den un kontinente preokupá pa e invashon ruso di Ukrania.
Durante dje buelo pa Hulanda, e mandatario tambe a publiká riba su kuenta Truth Social un mensahe di elogio na e organisadó dje sita, e sekretario general di NATO, Mark Rutte.
“Pabien i danki pa bo akshon desisivo den Iran, ku tabata realmente ekstraordinario. “Awor nos ta riba kaminda pa otro éksito grandi den Den Haag. No tabata fásil, pero nos a logra pa tur hende firma e 5%”, segun el a skirbi pa Rutte.
