WASHINGTON (AFP).- Donald Trump a duna di konosé ayera ku e periodo di pas den Medio Oriente ta den un kondishon krítiko, deskartando e kontra proposishon di Iran pa pone fin na e guera i ku ta inkluí final dje blokeo norteamerikano di hafnan iraní. Ademas di esei, mester liberá e kuentanan bankario dje pais ku aktualmente ta konhelá.
E tenshon kresiente ta indiká posibel regreso di e guera den Golf i na mes momento ta trese duda den e espektativanan di un akuerdo pa habri e kanal di Ormuz bèk pa komèrsio. Pareu ku esei, e situashon a bolbe trese preshon riba preis di petrolio.
Iran a duna di konosé ayera di ta eksigí e fin di guera den e region, tambe pa lanta e blokeo norteamerikano di su hafnan i liberashon di su kuentanan ku a keda kongelá, komo reakshon riba e plan di Trump. E mandatario republikano a reakshoná ku furia riba e kontesta di Tehran i den un mensahe riba retnan sosial a kalifiká e kontra oferta di ta “totalmente inaseptabel”.
Den enkuentro ku prensa na White House, e mandatario a trese dilanti ku e desishon pa stòp bombardeo riba Iran ta bou di “respirashon artifisial” i ku “ta manera ora ku dòkter drenta i bisa: “Señor, bo ser stimá tin eksaktamente 1% di posibilidat di bida”.
Pero asina mes, den un entrevista via telefòn ku un periodista di Fox News, Trump a duna di konosé di ta kontemplando pa kuminsá bèk su operashon pa kompañá barkunan den e kanal di Ormuz. Un inisiativa ku el a suspendé dia 5 di mei, un dia despues di a anunsiá “avansenan grandi” den kòmbersashon ku Iran pa yega na un akuerdo.
E promé minister israelí, Benjamin Netanyahu, djadumingu último a duna di konosé ku e guera lo no kaba sino te ora ku nan destruí instalashonnan nuklear di Iran.
