WASHINGTON, AP.- Presidente Donald Trump a presentá David Malpass komo “e persona adekuá pa asumí e trabou inkreiblemente importante aki”.
Malpass, kende ta supsekretario pa asuntu internashonal di Departamento di Finansa, tabata un krítiko fuerte kontra Banko Mundial, formá pa 189 nashon. El a indiká ku e banko tabata demasiado okupá ku su propio ekspanshon i no sufisiente riba su mishonnan fundamental, manera kombatí pobresa.
E funshonario di 62 aña a indiká kla ku su enfoke pa Banko Mundial lo inkluí un promoshon di agènda di e gobièrnu di Trump pa e paisnan den desaroyo.
Funshonarionan di gobièrnu a indiká ku Malpass lo evaluá programanan di e Banko Mundial basá riba kriterionan manera si esakinan a yuda ku oumento di entrada i mehorá transparensia finansiero.
E funshonarionan a pidi pa keda anónimo pa por deliberá e plannan trankil.
E kombate kontra kambio di klima ta un prioridat pa e Banko Mundial, no ta entre e indikadónan di éksito ku funshonarionan a nombra, ounke nan a indiká ku Malpass lo respetá e inisiativanan ku ya ta eksistí.
