Kanal di Hormuz, via kua un kinta parti di eksportashon mundial di petrolio ta pasa.
WASHINGTON (AFP).- Donald Trump ayera a ordená e blokeo naval dje kanal di Hormuz despues di denunsia ku Iran a mantené un posishon “no fleksibel” riba su ambishonnan nuklear durante di negosiashonnan ku a tuma lugá na Pakistan. E frakaso di negosiashonnan den Islamabad ta generá preokupashon riba e frágil akuerdo di pas.
E mandatario merikano a rekonosé ku e kòmbersashonnan tabata “bon” i ku a alkansá un akuerdo riba mayoria punto, ku eksepshon dje asuntu nuklear, segun un publikashon riba Truth Social.
Trump a anunsiá ku armada di Merka lo start ku “efekto inmediato” un blokeo pa tur barku ku ta purba na drenta òf sali dje kanal di Hormuz i a bisa mas aleu ku lo kuminsá destruí tur e minanan ku Iran a koloká.
“Hopi lihé e blokeo lo kuminsá. “Otro paisnan lo ta envolví, segun el a agregá sin duna mas detaye. For di inisio dje guera – ku a provoká míles di morto, sigur na Iran i Libano- Teheran ta mantené un kontròl estrikto pa pasa den e kanal, via kua un kinto parti di eksportashon mundial di petrolio ta pasa.
Mohamad Baqer Qalibaf, presidente di parlamento iraní i kende a dirigí e delegashon di su pais na Pakistan, den su regreso na Teheran a trese dilanti ku e pais “lo no hinka rudia pa ningun menasa di Washington”.
Kantidat di morto
Iran ayera a informá ku Instituto di Medisina Forense a menshoná e kantidat di 3.375 morto durante e guera miéntras ku Human Rights Activists News, ku sede na Merka, a referí na 3.597 di kua 1.665 ta sivil i entre esaki 248 mucha.
