WASHINGTON (AFP).- Gobièrnu di Donald Trump ayera a duna pèrmit di benta di parti dje oro venezolano na Merka, den un fleksibilisashon nobo di sanshonnan di Washington kontra di Caracas for di despues di kaida di Nicolás Maduro. Segun un dokumento publiká riba wèpsait di Departamento di Finansa di Merka, e transakshonnan ku “Compania General de Mineria de Venezuela” (Minerven) òf su filialnan ta bolbe keda outorisá. E lisensia pa awor aki ta permití solamente interkambio via di Merka i pa empresanan radikal den e pais, kual nan ta keda outorisá pa re-eksportá e metal.
E outorisashon aki ta pa garantisá ku e oro ta bini for di Venezuela mes, i ta prohibí transakshon pa Iran, Nort Korea, Rusia, China i Cuba, un kondishon ku ya ta keda apliká ku benta di petrolio venezolano.
Merka a bolbe outorisá eksportashon di petrolio venezolano, pero ta mantené kontrol riba e proseso. E entrada generá ku benta di krudo, komo tambe belasting relashoná ku esaki, mester keda depositá den un fondo spesífiko supervisá pa Departamento di Finansa di Merka i ku aktualmente ta radiká na Qatar.
