…Miéntras ku ta bon kla ku Zelenski i Ukrania no por konta ku sosten di presidente norteamerikano Donald Trump, e diferente gobièrnunan europeo si ta anunsiá nan sosten na Zelenski. Inkluso Rei Charles III di Gran Bretania djadumingu último a risibí Zelenski…
WASHINGTON (AFP).- Donald Trump ayera a intensifiká su menasanan kontra dje presidente di Ukrania, Volodimir Zelenski, kende e ta akusá di no ke pas ku Rusia. Pero ainda e ta konsiderá komo posibel pa yega na un akuerdo riba mineralnan ukraniano.
Zelenski a insistí ku ta su deseo pa e guera ku Mòsku kaba “mas lihé posibel”.
“No mester ta asina difísil pa yega na un akuerdo. I e akuerdo ei ta algu ku por logra hopi lihé”, segun e mandatario norteamerikano a deklará na periodistanan, den un esfera ainda straño pa su lantamentu di bos djabièrnè último den enkuentro ku Zelenski.
“Oké, kisas tin un hende ku no ke yega na un akuerdo i si e persona ei no ke un akuerdo, mi ta kere ku e persona ei lo no ta na su puesto pa hopi tempu mas”, el a agregá.
Trump mas aleu a bisa ku e presidente ukraniano mester ta mas “gradisí” pa e yudansa norteamerikano.
Pero e no a duna komo morto un akuerdo riba mineralnan, akuerdo ku Zelenski mester a firma na Washington siman pasá i ku lo a duna Merka akseso na teranan ukraniano kaminda tin materia prima.
Den un video publiká djaluna anochi, e hefe di estado ukraniano a ripití su petishon di risibí garantianan di seguridat.
“Ta netamente e falta di garantia pa seguridat ya pa 11 aña ta loke a permití pa Rusia kuminsá e okupashon di Crimea i e guera den Donbas i despues e falta di garantianan di seguridat a permití pa Rusia lansa un invashon na gran eskala”, segun el a bisa.
Komo reakshon riba un deklarashon hasí di parti di Zelenski djadumingu na Londres, esta, “ku un akuerdo pa pone fin na e guera ta hopi leu”, Trump e menas’é riba e ret Truth Social ku “lo mi no tolerá e kos ei pa hopi tempu mas”.
Reakshonando riba e komentarionan dje presidente norteamerikano, Kremlin -ku a ordená e invashon di Ukrania den febrüari di 2022- a bisa ayera ku, “mester fòrsa Zelenski” pa firma un akuerdo pa pone fin na e konflikto pasobra “na e momento akí ta Zelenski no ke pas”.
