WASHINGTON, AP.- Pegá den un disputa komersial enorme ku China, presidente Donald Trump a disidí ku e lo no deklará guera komersial kontra otro paisnan. Kas Blanku a indiká ku lo posponé e desishon pa imponé impuesto riba importashon di outo durante seis luna. Esaki ta un medida ku lo impaktá Europa i Hapon fuertemente.
Trump ta spera di por usa e menasa di impuesto komo faktor di preshon pa fòrsa Hapon i UE pa hasi konseshon den e negosiashonnan komersial ku ta tumando lugá.
Departamento di Komersio a presentá su rekomendashonnan na Kas Blanku den luna di febrüari. Ounke esakinan no a wòrdu publiká, opinion generalisá ta indiká ku e rekomendashonnan ta inkluí e posibilidat pa apliká e impuesto.
Oudiensianan públiko di aña pasa a revelá ku no tin praktikamente ningun sosten pa e aplikashon di impuesto, ni entre e fabrikantenan merikano.
China i Merka, pegá den un konfrontashon i ta sigui apliká impuesto riba produkto di e otro pais, balorá na algun shen mion dòler.
