WASHINGTON (AFP).- Ayera Donald Trump a bolbe preshoná e presidente ukraniano, Volodimir Zelenski, pa alkansá un akuerdo ku ta pone fin na e konflikto de Ukrania, ya ku e presidente ruso, Vladimir Putin, ta “dispuesto” na hasi esei. “Zelenski mester move i yega na un akuerdo. “Segun mi ku Putin ta kla pa un akuerdo”, segun e presidente norteamerikano.
Usando atrobe ekspreshonnan ku el a usa durante di un reunion tenso den White House komo un aña pasá, ora ku el a reklamá Zelenski públikamente, Trump a sugerí ku e dirigente ukraniano ta den un posishon debil ku ta oblig’é na hasi konseshonnan. “Bo no tin e kartanan. Awor bo tin ménos karta den man”. E presidente merikano ta konsiderá pa basa tempu kaba ku e apoyo di Merka na Ukrania ta un gastu eksesivo, miéntras ku el a manifestá su atmirashon pa Putin, kende el a invitá na ougùstùs último pa bai Alaska. Su komentarionan nobo riba Ukrania ta koinsidí ku e guera ku el a lansa huntu ku Israel kontra di Iran, den kua Merka a invertí miónes di dòler.
For di su yegada na poder den yanüari di 2025, Trump a primintí di lo pone fin na e konflikto den Ukrania, aunke awor e ta rekonosé ku no ta fásil pa logra e meta ei. Turesten Rusia ta mantené su atakenan den teritorio ukraniano miéntras ku Trump ta resistí pa tuma medidanan kontundente kontra di Putin.
