Un potrèt di lokual e presidente merikano Donald Trump a publiká riba Truth Social, ku bandera merikano kubriendo teritorio venezolano.
WASHINGTON (AFP).- Presidente di Merka, Donald Trump, ayera a publiká riba su plataforma Truth Social un potrèt di mapa di Venezuela ku den fondo bandera di Merka i e teksto “51º State”.
E publikashon provoká, publiká miéntras ku Trump tabata dirigí su mes pa China pa un kumbre di nivel haltu, a yega dianan despues ku e presidente interino di Venezuela, Delcy Rodriguez, a bisa ku su pais “nunka” a konsiderá pa bira estado number 51 di Merka, ni sikiera despues ku forsanan dje pais ei a kapturá i baha Nicolas Maduro den yanüari.
Mas trempan djaluna, Trump a bisa na Fox News ku e ta konsiderando pa konbertí e pais suramerikano den un estado nobo, despues di lunanan ku e ta kontrolá e nashon riku na petrolio. Di su parti, Rodriguez a supervisá un kambio den e relashonnan ku Merka for di despues ku el a asumí mando dje pais, aprobando reformanan ku a habri bèk e sektornan minero i petrolero di Venezuela pa empresanan strañero, spesialmente merikano.
Oposishon venezolano a eksigí pa yama elekshon, miéntras ku Rodriguez ora a puntr’é dia 1e di mei riba posibel elekshon nobo, a bisa “mi no sa” i ku esei por tuma lugá “na kualke momento”.
