Presidente venezolano Nicolás Maduro a haña un nò bon kla riba su petishon pa un reunion ku Donald Trump.
WASHINGTON (AFP).- Presidente di Merka, Donald Trump, a rechasá e invitashon pa diálogo ku a keda hasí na su persona den un karta dje mandatario venezolano Nicolas Maduro. E rechaso ei a tuma lugá ayera, miéntras ku un ala mayoritario di oposishon venezolano ta respaldá e presensia militar norteamerikano den Karibe.
E tenshon entre ámbos gobernante a oumentá for di despues ku un luna pasá Merka a desplegá ocho barku di guera den Karibe ku e argumento ku esei ta pa kombatí narkotráfiko i ku Trump ta akusá Maduro di ta lider di un organisashon ku ta trafiká den droga.
“Maduro a ripití hopi mentira den su karta i e posishon di gobièrnu relashoná ku Venezuela no a kambia”, segun e bosero di White House, Caroline Leavitt, den un rueda di prensa. “Presidente Trump a demostrá bon kla di ta dispuesto na usa tur medio nesesario pa para e tráfiko ilegal di droga ku ta bini dje régimen di Venezuela”, segun el a agregá komo reakshon riba e karta ku a keda publiká djadumingu último di parti di gobièrnu venezolano.
Maduro a hasi un yamada riba Trump pa “preservá pas mediante diálogo i entendimentu den henter e hemisferio” i a tilda komo “apsolutamente falsu” e akusashon di tráfiko di droga di parti di Washington kontra di su persona.
E presidente venezolano, kende ta denunsiá un “menasa” pa un “kambio di régimen” na Venezuela, ta sigurá ku su pais ta “liber di produkshon di droga”. Es mas, te hasta apénas 5% di e droga ku ta keda produsí serka su bisiña Colombia ta keda trasladá pa teritorio venezolano.
White House no a rekonosé Maduro komo presidente di Venezuela debí na e denunsiánan di froude di parti di oposishon despues di su re-elekshon den 2024, i ta ofresé un rekompensa di 50 mion dòler pa logra su kaptura pa motibu di ta lider di “Cartel de los Soles”.
“Un medida nesesario”
“E designashon di ‘Cartel de los Soles’ komo un organisashon terorista ta referí di forma dirèkt na e naturalesa dje problema”, segun e èks-rival di Maduro den elekshon presidensial, Edmundo Gonzalez Urrutia, kende a denunsiá froude den elekhon.
“E medida anti droga den laman Karibe liderá pa Merka ta un medida nesesario pa por desmantelá e struktura kriminal ku ainda t’ei komo e úniko opstákulo pa restablesimentu di e soberania popular na Venezuela”, segun el a bisa den un video dirigí na lidernan ku e siman akí ta reuní na New York den kuadro di Asamblea General di Nashonnan Uní.
Urrutia pa un aña kaba ta biba den eksilio na Spaña despues ku gobièrnu di Chaves a saka un órden di detenshon kontra di su persona.
