Potrèt grandi di e lider supremo di Teheran, Ayatollah Mojtaba Khamenei, kende a presentá kondishonnan di pas ku Donald Trump a rechasá.
WASHINGTON (AFP).- Presidente di Merka, Donald Trump, a kalifiká komo
“totalmente inaseptabel” e kondishonnan di Iran pa pone fin na e guera den Medio Oriente, loke ta oumentá e posibilidat ku e konflikto lo sigui despues di tres siman di negosiashon. “M’a kaba di lesa e kontesta di esnan yamá ‘representantenan’ di Iran. “Mi no ta gusta, e ta totalmente inaseptabel”, segun Trump a skirbi riba Truth Social.
“Iran mas trempan a reakshoná riba e último proposishon di parti di Washington, atvirtiendo ku lo e no keda sin reakshoná riba kualke atake nobo di parti di Merka i tampoko lo permití barkunan estranhero den e kanal di Ormuz. Mas ku un luna despues ku dia 8 di aprel a disidí pa stòp ku e atakenan, no tin avanse pa yega na un solushon duradero ni e fin definitivo dje guera den Medio Oriente, ku a start dia 28 di febrüari ku un atake di parti di Israel i Merka kontra di Iran.
Iran a respondé komo represaya den vários pais dje region i a blòkia e kanal di Ormuz. E konflikto a kousa morto di míles di hende, prinsipalmente den Iran i Líbano, i a destabilisá ekonomia mundial.
“E Repúblika Islamita di Iran a manda via di un mediadó pakistaní, su reakshon na e último teksto proponé di parti di Merka pa pone fin na e guera”, segun e agensia ofisial di notisia IRNA, sin duna mas detaye. E agensia a asentuá ku e kontesta di Iran ta pa “pone fin na e guera i garantisá seguridat marítimo” den Golfo i den e kanal di Ormuz. Trump no a menshoná e anunsio di Iran den un publikashon ekstenso ku el a pone riba Truth Social ayera, pero a akusá e repúblika islamita di ta “hari” di su pais. “Pero awor nan lo no hasi mas”, segun el a agregá.
Di akuerdo ku un funshonario haltu norteamerikano, Trump e siman aki ora ku e bishitá Beijin lo pone preshon riba e presidente chines Xi Jinping riba e asuntu di Iran. China ta un gran kumpradó di petrolio iraní.
Na Iran, e hefe militar Ali Abdollah a reuní ku e lider supremo dje pais, Mojtaba Jamenei, i, segun televishon estatal iraní, el a risibí instrukshonnan nobo pa kontinuashon di operashonnan den kanal di Ormuz.
Preis di petrolio ta bolbe subi
TOKIO, Hapon (AFP).- Preis di petrolio ta habri siman subiendo despues ku e presidente norteamerikano, Donald Trump, a bisa di ta rechasá e respuesta di Iran riba e proposishon di pas di Washington. Huntu ku esei, Iran a renobá su menasanan relashoná k’e kanal di Ormuz.
E referensia internashonal Brent pa entregá den yüli a subi ku 2.69% te na 104.01 dollar pa barí. Su ekivalente norteamerikano, West Texas Intermediate, a avansá ku 2.54% te na 97.84 dollar pa barí.
