Donald Trump a tuma medida kontra di Colombia, miéntras ku presidente kolombiano Gustavo Petro (d) a konvensí ku Trump ta risibí informashon robes dje situashon di droga na Colombia.
BOGOTA (AFP).- Presidente di Merka, Donald Trump, a akusá e presidente di Colombia, Gustavo Petro, di ta tolerá e produkshon di droga i a anunsiá di lo pone fin na e “pagonan di supsidio na gran eskala” na e pais suramerikano. “Kuminsando awe, e gastunan ei òf kualke otro forma di pago, lo no tuma lugá mas”, segun Trump a skibi riba Truth Social, agregando ku Petro “ta fomentando di manera fuerte e produkshon masivo di droga.
E mandatario kolombiano a reakshoná riba X i a sigurá ku e presidente norteamerikano” ta haña informashon robes di su asesornan. “Mi ta rekomendá Trump pa wak e santu aki bon i determiná na kua parti e narkonan ta i na kua parti e demokratnan”, segun el a agregá.
Luna pasá Washington a kita for di Colombia e kondishon komo pais aliado den e lucha kontra di narkotráfiko, un sertifikashon pa kua e pais tabata risibí algun shen mion dollar di parti di gobièrnu merikano, ku mas di 740 mion den 2023, e último aña di kua tin informashon kompleto.
E mitar dje pagonan ei ta bai pa e lucha kontra di droga. E sobrá ta apoyá programanan humanitario i di alimento.
Trump i Petro ku frekuensia ta kontradesí otro i e tono a eskalá for di despues ku Merka a desplegá un ofensiva militar den Karibe, ku atakenan fuerte riba barkunan ku supuestamente ta trafiká den droga. Den su publikashon di ayera, Trump a menasá ku algun tipo di intervenshon norteamerikano den Colombia.
“Petro, un lider poko balorá i hopi impopular den su pais, kende tin un aktitut insolente pa ku Merka, mester para di forma inmediato e problema di droga ku ta kousa asina tantu morto, òf Merka lo hasi esei, i lo no hasi esei di e mihó manera”, segun Trump a skirbi riba Truth Social.
