Donald Trump un biaha mas ta sufri derota den Korte.
WASHINGTON (AFP).- Presidente merikano Donald Trump ayera a anunsiá un belasting di importashon general nobo di 10% despues di un sentensia di Korte Supremo di Merka ku a husga ku e no tin derechi pa imponé tarifanan di duana komo si fuera ta un emergensia nashonal. Gobièrnu awor lo hasi uso di otro leinan, prinsipalmente e kódigo komersial aprobá den 1974, pa sigui kobra riba tur importashon, segun Trump a bisa algun ora despues di su derota den Korte, di mayoria konservador.
Trump a deklará di ta “profundamente desepshoná” ku e sentensia, i a akusá di forma dirèkt algun hues di korte den sentido ku nan ta someté nan mes na “interesnan strañero”.
E republikano, ku a basa gran parti di su polítika eksterior den un serie di belasting variabel na su antoho, a rekonosé ku no ta bon kla si e mester paga bèk e plaka ku te na e momento aki a rekoudá. Un estudio di Pennsylvania University a saka’fo ku e sifra por ta den kareda di 175.000 mion dòler. E aspekto aki “no a keda tratá di parti di Korte”, segun Trump a lamentá dilanti di periodistanan, i awor e peleanan den Korte por dura algun aña”, segun el a bisa.
E hues Brett Kavanaugh, ku no ta di akuerdo ku opinion mayoritario (6 kontra 3) di Korte, a atvertí ku e proseso legal por trese konfushon. “Trump no a rekonosé ningun eror ora ku el a usa e arma di belasting di importashon. “E eror ta dje seis huesnan ku a vota kontra, pa motibunan ‘polítikamente korekto’”, segun el a bisa.
