WASHINGTON, AP.- Mandatario Donald Trump a emití e promé veto di su presidensia pa protehá su deklarashon di emergensia pa finansiá e muraya na frontera.
Trump a sostené ku e lo no stòp di bringa pa e kompromiso prinsipal di su kampaña, kual e no a kuminsá kuné ainda miéntras ku falta 18 luna pa votamentu presidensial den Merka.
“Kongreso tin libertat pa aprobá e reoslushon”, asina Trump a deklará. “I mi tin e deber pa usa mi derechi di veto”.
Mayoria republikano a uni e demókratanan den Senado pa aprobá e resolushon konhunto ku a korona un siman di konfrontashon na Kas Blanku. Ta improbabel ku Kongreso ta haña mayoria di e dos terser parti di votonan pa anulá Trump su veto, ounke e demókratanan den Kámara di Representante a indiká ku lo purba logra esaki tòg.
Trump ke usa e deklarashon di emergensia pa reasigná miónes di dòler di presupuesto di defensa pa konstruí e muraya na frontera ku México. E medida ta enfrentá vários demanda di fiskalnan estatal demókrata i gruponan ambientalista ku ta konsiderá e deklarashon komo inkonstitushonal.
E prosesonan aki lo impedí Trump di haña e rekursonan adishonal pa konstruí e muraya durante vários luna òf mas tempu.
