Presidente di Fransia Emmanuel Macron (meimei) i su kasá Briggite Macron (r) saludando presidente Donald Trump
EVIAN, FRANSIA, AFP.- Donald Trump a yega na e kumbre G7 na Fransia, despues ku el a yega na un akuerdo ku Iran pa pone fin na e guera den Medio Oriente. El a bisa tambe ku e ke un solushon pa e guera na Ukrania.
Fransia a organisá e reunion di tres dia entre lidernan di ekonomianan prinsipal pa nan mehorá nan relashon ku Trump riba temanan internashonal. Sinembargo, e akuerdo entre Merka i Iran a kambia foko di e kumbre.
E paisnan di G7 ke pa estrecho di Hormuz bolbe funshoná normal, pa redusí e preshon riba preis di petroli. Despues ku a anunsiá e akuerdo, preis di petroli a baha. Trump a afirmá ku e estrecho lo ta “kompletamente habrí pa djabièrnè”.
Pero ainda tin duda si barkunan di zeta mester paga pa krusa den e estrecho. Merka a bisa ku esaki lo no ta e kaso, pero Iran a bisa djaluna ku e pais lo kobra tarifanan pa servisionan di nabegashon. Ainda no a publiká kontenido di e akuerdo.
Aparte di e konflikto den Medio oriente, Trump a bisa ku e ke purba media den e guera entre Rusia i Ukrania.
“Ayera nos tabatin un bon kòmbersashon ku presidente ukraniano Volodymyr Zelenskyy i presidente ruso Vladimir Putin. Mi ta kere ku nos mester por logra algu”.
Zelenskyy a bisa ku e lo biaha awe pa Evian i el a proponé pa reuní ku Putin durante G7. Pero el a sigurá ku Moscow no ta kla pa negoshá pa pone fin na e guera.
