SUNRISE, FLORIDA, MERKA, AP.- Donald Trump a akusá presidente Barack Obama di funda grupo Estado Islámiko i a ninga di hala su denunsia falsu aden apesar di petishon di algun di su aliadonan.
Un dia despues di lansa e atake durante un akto, Trump a insistí riba esei durante un serie di entrevista. Na momentu ku e komentarista polítiko Hugh Hewitt a puntr’é si e kier men ku e polítika eksterior di Obama a krea a kondishonnan na Irak i Siria ku a permití floresementu di e milisia, Trump a rospondé: “No, mi kier men ku e ta fundador di Estado Islámiko. Esei ta loke mi ta bisando”.
Hewitt a puntra Trump si e ta rekonosé ku Obama ta odia Estado Islámiko i ku ta “purbando di mata nan”. Den último dos aña Obama a organisá un koalishon amplio di pais i ordenando mas di 10.000 atake aéreo pa derotá e milisia.
“No ta importá mi”, Trump a bisa. “E tabata e fundadó. E manera kon el a sali di Irak, esei tabata e fundashon di Estado Islámiko”.
E kampaña di Clinton a akusá Trump di “bisa kosnan estúpido” na e pais sin presente plan antiterorista di su mes. E asesor polítiko prinsipal di Clinton, Jake Sullivan, a vinkulá e kandidato republikano ku presidente ruso Vladimir Putin.
