PHILADELPHIA, AP.- E aktivista pa derechonan sivil Dolores Huerta, kende ta subi podio riba e último anochi di Konvenshon Demókrata, a bisa ku e kandidato republikano pa presidensia Donald Trump ta un peliger pa tur klase trahadó i ku e úniko forma pa par’é ta atraves di votamentu.
“Republikanonan a pone un persona manera Trump, ku ta mustra un hende no stabil na su mente, den su akshonnan”, segun Huerta di 86 aña a bisa na medionan di komunikashon na Philadelphia. Huerta ta di orígen mehikano.
” E ta un peliger hopi grandi pa e pais, spesialmente pa nos, esnan koló skur, muhénan, nos hendenan trahadó”, asina el a agregá. “Nos tin e arma mas potente pa para Trump, ku ta votamentu. Esaki ta un arma sin violensia ku nos por usa pa gan’é.
Trump a proponé pa konstruí un muraya na frontera entre México i Merka pa para inmigrashon outorisá. E kandidato a hasi hispanikonan furioso bisando ku entre e inmigrantenan mehikano tin algun violadó i delinkuentenan ku ta trese droga den Merka.
Huerta, kende huntu ku Cesar Chavez a funda Union di Kampesinonan (UFW) a ekspresá su apoyo na e kandidato demókrata pa presidensia Hillary Clinton, kende tambe ta papia riba e último anochi pa aseptá e nominashon pa presidensia.
” Clinton ta un inspirashon pa tur muhé”, el a agregá ku apesar di su edat e tabata hopi aktivo den e kampaña elektoral demókrata.
Djárason Trump a bisa den un komunikado ku e demókratanan no ta ofresé solushon pa problemanan ku Merka ta enfrentá i ku e ta papia na nòmber di esnan élite i bankonan grandi. E no ta papia na nòmber di e merikanonan ku ta sufri.