CARITA BEACH (AP).- Un tsunami ku nan ta kere ku a ser stimulá dor di un erupshon volkániko a mata por lo ménos 222 hende na Indonesia durante un fin di siman basta drùk. E tormenta aki a kita hotèlnan for di mapa, ademas di un kantidat di kas i un grupo di hende ku tabata asistiendo un konsierto na playa. Mas ku 800 hende a ser reportá komo heridá i 28 ku ta buskando despues ku e tsunami aki a dal den bisindario di Sunda Strait riba djasabra anochi, esei di akuerdo ku e agensia ku ta sigui e desaster i ta manehá un ke otro. E kantidat di víktimanan lo sigui subi pa motibu ku tin un kantidat di aria ku no a ser alkansá ainda dor di outoridatnan di reskate.
Sientífikonan, inkluyendo esnan di e agensia meteorológiko di Indonesia a duna di konosé ku e tsunami aki lo por a ser kousa dor di aktividatnan supteraneo den laman òf esnan ku ta tuma lugá riba nivel di laman debí na erupshon volkániko di Anak Krakatau. E nòmber dje volkan ta nifiká “Yu di Krakatoa”, ku ta un isla volkániko ku a ser formá atraves di añanan despues di algun dje erupshonnan di mas grandi registrá den historia mas ku un siglo pasá.
Videonan dramátiko riba medionan sosial ta mustra un banda di pòp indones yama “Seventeen” presentando bou di tènt na un playa popular durante konsierto pa empleadonan di un kompania di elektrisidat. Un kantidat di hende tabata sinta na mesa ta skucha músika, miéntras ku otronan tabata baila riba tononan di e banda, ora ku direpente a surgi manera un korto sirkuito riba tarima i huma a kuminsá sali. Despues di esei e stage a kèntel dor di e furia di laman, tirando henter e banda i su integrantenan te den e públiko. E agrupashon a duna di konosé despues den un komunikado ku tres di nan integrantenan a muri.
Ofisialnan di gobièrnu a partisipá ku nan a registrá 222 morto te ainda i ku por lo menos un 843 hende herida.
