Girigorie: E pueblo no por wanta mas
WILLEMSTAD.- Mester yega na solushonnan pa pais i alabes solushoná diferente reto ku tin. Ta papia hopi aña ku mester diversifiká ekonomia, pero te ainda no a tuma e desishonnan pa logra esaki. “Awor si ora 0 a yega i mester krea sektornan ekonómiko nobo duradero ku ta habri kuponan di trabou nobo i amplia e poblashon di pais ku ta traha, miéntras mester buska un solushon tambe pa oumento di kosto di bida ku ta sigui hasi e pueblo mas pober.”
Miembro di Partido Nashonal di Pueblo (PNP), Norman ‘Nooi’ Girigorie, ta lansa e gritu akí mirando ku prosperidat di pais i bienestar di e pueblo di Kòrsou ta bou di preshon. Na su opinion gobièrnu mester lucha pa krea un ekonomia mas duradero i traha mas pa oumentá forsa di kompra di e hende.
“A primintí ku ta habri refineria atrobe, te asta a habri pòst 5 promé ku elekshon, pero a resultá ku ta speransa falsu. Mester remplasá e bashí ku refineria a laga atras. Mester demostrá Reino kompletu ku nos ta traha duru pa diversifiká nos ekonomia i traha riba kresementu ekonómiko.”
E ta mustra ku forsa di kompra di e pueblo pa hopi aña kaba ta bayendo atras. Preis di produkto ta subi, suèldu mínimo ta keda atras riba oumento di kosto di bida, miéntras ku penshonadonan i kobradónan di ònderstant ta den un lucha diario pa por hiba un bida digno. “Esaki ta algu ku nos sa i tin hopi aña ta señalá. A yega e momento ku ta kuminsá aktua.”
P’esei, huntu ku kresementu ekonómiko Girigorie ta boga pa analisá e forma ku ta kobra impuesto na Kòrsou, entre otro e bendita ‘omzetbelasting’ (OB) ku ta pone ku forsa di kompra di e pueblo ta bai atras, loke hasta tin efekto negativo riba su salú físiko i mental pasobra e no ta logra paga tur su gastunan. “Pero gobièrnu aparentemente no ta tene kuenta ku esaki. Al kontrario, gobièrnu ta kontribuyendo pa e bida bira mas karu pa e hende.”
Girigorie ta mustra ku mas karu e produkto bira, mas OB gobièrnu ta risibí, ku na su opinion ta un pensamentu robes di parti di gobièrnu. “Ta parse ku gobièrnu no ta interesá den e hende i ta wak solamente ta kuantu sèn e ta risibí miéntras ta laga e hende sufri numa. Kada bes ku preisnan subi e florin den e saku di e pueblo ta devaluá pasobra ta ménos kos e por kumpra ku e kantidat di sèn ku e tin.”
Girigorie ta enfatisá finalmente ku mester ta alerta pa hendenan ku semper a biba bon i no ta tuma desishon korekto pa e pueblo. “Esaki pasobra nan no ta komprendé e doló di e pueblo marginá.”
