Polis ku a bai duik pa hòbi ta haña pikòp registrá pèrdí den fondo di laman na Shut
WILLEMSTAD.- Korte di promé instansia ayera a trata e promé dia di kaso Venema. E kaso a a kuminsá den oranan di mainta i a terminá te den oranan di atardi.
Ta trata di e kaso di asesinato di e hòmber hulandes Mike Venema di 53 aña .
Pa ku e kaso aki e akusadonan muhé
Suyanti M., Ervinella F. i Eurodis J. huntu ku e akusadonan hòmber Shakir C. i Shahier P. a presentá den sala di korte di ayera pa kada unu responsabilisá nan mes pa nan aktonan. Tur 5 ayera a atmití di tabata involukrá den e kaso. Kada un tabatin su ròl. Pero kada unu tabata sa ku e akusado a fayesé i tambe a mira kon esaki a tuma lugá. Durante un “ pool sex party “ ku a keda organisá.
Despues di un investigashon a haña e víktima den su pikòp djabièrnè 5 di yüli 2019 den fondo di Laman na Shut. Na momento ku polis huntu ku algun persona ku ta duik pa hòbi a haña pikòp intakto bou di awa. E polis a kue e number di outo i asina kuminsá ku e investigashon. A resultá ku ta trata di e viktima ku a keda registrá pèrdí for di sèptèmber 2018.
Segun e akusashonnan dia 12 di sèptèmber 2018, e akusadonan lo a basha un supstansia prohibí den wiski di e víktima, pa asina e por drumi.
Banda di esaki nan a pas’é angua na su garganta pa asina por garantisá ku e ta kai den soño.
Algu lo a bai robes i e víktima a fayesé. Despues di nan akto, e akusadonan a pone Mike den un pikòp (ku ta un Ford Raptor) tras di su stür i asina laga e vehíkulo kore drenta awa na Shut.
Mas aleu dos di e muhénan ta keda akusá di a entretené Venema i a lag’é bira inkonsiente, miéntras e akusadonan hòmber tabata kana buska kos pa hòrta.
Pa loke ta trata e di 3 akusashon, tur ta keda akusá di kometé ladronisia for di den e kas kaminda Venema tabata keda na Jansofat.
Tur kos a kuminsá na momentu ku amigu di e viktima a bati alarma di su desaparishon. E tabata biba den un apartamentu na Anasaweg na Kòrsou, pero promé ku e la disparsé e tabata keda den un kas na Jan Sofat (resort).
Despues di konsultá ku outoridatnan na Kòrsou, a disidí ku lo hiba un investigashon konhunto.
Pa medio di e programanan di búskeda “Team West, Opsporing Verzocht” i retnan sosial a pidi atenshon pa e kaso akí. Foundation Peter R. de Vries a pone un rekompensa di 100 mil euro na disposishon pa trese solushon i resolvé e kaso ku a yega na detenshon di tur e akusadonan. Ayera wes a opta pa trata e kaso unu unu. Esaki pa no stroba den nan deklarashonnan.
